KAPANGYARIHANG PULITIKAL

Ang pagwawagi ni Barack Obama bilang pinuno ng Estados Unidos ay bumuwag sa kasaysayan ng usaping pamahalaan sa nasabing bansa.Buong mundo ay naging saksi sa pangyayaring ito. Ang katunggaling si McCain na naglatag din ng magandang panukala para sa higit na ikabubuti ng bansa ay tinanggap ng maluwalhati ang kaniyang pagkatalo.

Wala pang 24 oras, nalaman na kung sino ang nagwagi, mabilis at naniniwala akong malinis ang mga pangyayari..walang bahid ng pandaraya, hindi yata uso yon don, dito lang sa Pinas talamak yan.

Isa lamang pagpapatunay na ang utak ay walang pinipiling kulay, kasarian, lahi at paniniwala, tanging matalinong pagpapasiya, tiyak na makukuha ang naisin.Hindi ang panlabas na kaanyuan ang magsisilbing sandata ni Obama upang harapin niya ang mga naghihintay na proyekto at programa sa White House. Ano man ang kahihinatnan ng pamumuno ni Obama, ito ay kaniyang tadhana na dapat harapin at panindigan. Ipinakita din sa halalang ito ang “ego” ng mga puti, inaasahang mas maraming kakampi kay McCain dahil ito ang lahi niya, samantalang si Obama ay hindi puro, may lahing itim at puti, kapag pinaghalo kayumanggi, hindi kaya isang Pinoy si Obama, patawa lang..huwag seryosohin.

Sana lang ang proyekto ng ating pamahalaang Pilipinas ukol sa pagpapabilis ng halalan sa 2010 ay maitulad na sa Estados Unidos, nakakapagod na ang bilangang inaabot ng halos isang taon, ang talong kandidato hindi matanggap ang kaniyang kinasadlakan, ipapabilang ang mga balotang itinago,papabotohin ang mga patay, gagapangin si Kapitan para magpamudmod ng pera isang araw bago magbotohan, papatayin ang ilaw sa kwarto ni Inang guro sa oras ng bilangan, ang tinta na nagsisilbing marka na animo’y kulangot sa hintuturo, ang manila paper na may guhit bakod-bakod, tally nga ba si Congressman, landslide ba si Gob.

Naiintindihan ko naman ang sentimyento ng mga kandidato, kapag hindi sila nanalo, aba katakot takot na pagbabayad yan, mamumuhunan ka muna bago ka maging pinuno ng pamahalaang Pilipinas, itataya mo ang iyong dignidad, isasanla mo ang iyong kalulwa, makuha lamang ang pinakamasarap na pwesto, ang maging buwaya.

Artista ka ba, pwede kang maging pinuno, basurero ka, pwede ka ring maging pinuno, walang pumipigil, kung makapal apog mo, pwede ka ng maglingkod sa Pilipinas. Pwede ka ng uminom ng mineral water at kumain ng tsokalate habang may session sa kongreso o sa senado…ayos na ayos, gagastos ka lang ng buwis ng mga kulisap…walang pumipigil, nakalulunod ang ligayang hatid ng may kapangyarihan, mapapasayaw ka..tintitiyak ko ‘yan.Upang bumangong higit ang iyong ngalan, ipagiba ulit ang kalye, sementuhan ulit, lagyan ng pangalan..ayos..may proyekto na si Mayor.

Huwag ka ng malungkot, naiintindihan kita, mataas lang talaga ang dunong nila kaysa sa mga kulisap na tulad natin.

PATALASTAS: